L’Estudiu llingüísticu nel centru-occidente asturianu (ELCOA): dalgunes interpretaciones y conclusiones

Esti trabayu ta basáu nos datos publicaos nel Estudiu llingüísticu nel centru-occidente asturianu (ELCOA). Pequeñu atles dialectográficu (Rodríguez Monteavaro 2023), un atles llingüísticu dialectal centráu nel área centro-occidental d’Asturies (nel norte de la Península Ibérica). Los 361 ítems llingüísticos investigaos en caún de los 18 puntos d’encuesta del ELCOA fueron trataos dialectométricamente (Rodríguez Monteavaro 2025) col fin d’atopar estructures dialectales superiores a les que la dialectoloxía tradicional proponía y equí, agora, relaciónense esos resultaos de los análisis dialectométricos con dellos aspectos característicos físicos, poblacionales y sociollingüísticos del área d’estudiu. L’oxetivu principal d’esti capítulu ye amostrar delles conclusiones a partir de los análisis realizaos nuna frontera llingüística interna del asturllionés, que fuera trazada polos investigadores Menéndez Pidal (1906ab); Rodríguez-Castellano (1954); Catalán (1956, 1957) y García Arias (2003), pero que necesitaba ser revisada con ferramientes informátiques matemático-estadístiques pa llegar a un mayor grau de precisión.